monumenta.ch > Ioannes Saresberiensis > sectio 7

Word Selection for Searching

Report an Error in this Sectio
Ioannes Saresberiensis, Epistulae, 285, 7
Receperat ante paucos dies rex Anglorum per sanctissimum virum priorem de Monte Dei, et iam dictum Bernardum de Grandimonte pro Cantuariensi archiepiscopo commonitorias domini papae, quarum tibi exemplum mitto, pacisque probandae spem dederat, si modo dominus Cantuar. ei coram hominibus speciem humilitatis praetenderet, persuaseratque viris religiosis quod eum in omni honore et libertate Ecclesiae totius regni post dominum et principem constituere disponebat, unde eorumdem consilio accitus archiepiscopus a rege Christianissimo, cum coexsulantibus sibi huic colloquio interfuit, et in omni humilitate flexis genibus ad regis sui pedes accessit in conspectu omnium, hac forma verborum utens: 'Miseremini mei, domine, quia pono me in Deo et vobis ad honorem Dei et vestrum.